Bizneset raportojnë keqësim të gjendjes financiare dhe ulje të shfrytëzimit të kapaciteteve

Sipas vrojtimit periodik të Bankës së Shqipërisë, vlerësimet e bizneseve për gjendjen financiare dhe normën e shfrytëzimit të kapaciteteve kanë pësuar rënie për shumicën e sektorëve të ekonomisë, ndërsa rritje ka shënuar vetëm sektori i ndërtimit.

Shfrytëzimi i kapaciteteve pësoi rënie në sektorin e industrisë, me 0.6 pikë përqindje, në sektorin e shërbimeve, me 0.8 pikë përqindje dhe në sektorin e tregtisë, me 0.9 pikë përqindje. Ndërkohë, në ndërtim u regjistrua një rritje e shfrytëzimit të kapaciteteve me 1.2 pikë përqindje.

Nj ecuri të ngjashme shfaqi edhe treguesi i gjendjes financiare, që u rrit në sektorin e ndërtimit, me 2.8 pikë përqindje, por regjistroi rënie në sektorin e shërbimeve, me 2.2 pikë përqindje, në sektorin e industrisë, me 5.9 pikë përqindje dhe më shumë në sektorin e tregtisë, me 13 pikë përqindje.

Rënia e vlerësimeve të biznesit për shkallën e shfrytëzimit të kapacitetit prodhues ishte në linjë edhe me ecurinë e treguesi të ndjesisë ekonomike. Për muajin shtator indeksi i besimit u rrit vetëm nga ndërtimi dhe pjesërisht nga ndjesia konsumatorë, ndërkohë që pësoi rënie në të gjithë sektorët e tjerë të ekonomisë.

Shfrytëzimi më i ulët i kapaciteteve prodhuese, në vija të përgjithshme, përputhet edhe me një ngadalësim të ritmeve të rritjes ekonomike gjatë këtij viti. Të dhënat e INSTAT treguan se për 3-mujorin e dytë të vitit ekonomia shqiptare u rrit me 3.61%, normë kjo më e ulët se rritja e rishikuar prej 3.71% e tremujorit të parë.

Deri tani, rritja ekonomike është në nivele të përafërta me gjysmën e parë të vitit të kaluar, ndërsa struktura e rritjes vazhdon të jetë e ngjashme.

Ekonomia shqiptare vazhdon të vuajë ecurinë e dobët të sektorëve të saj prodhues, ndërsa rritja po mbështetet kryesisht te sektorët e lidhur kryesisht me konsumin dhe ofrimin e shërbimeve.

Bujqësia po vijon edhe këtë vit tendencën disavjeçare rënëse. Industria shënoi një rritje shumë të vogël në tremujorin e dytë, por kontributi i saj në rritjen ekonomike për gjysmën e parë të vitit ngeli negativ.

Kontribuuesi kryesor në rritjen ekonomike në gjysmën e parë të këtij viti ka qenë sektori publik, ndërsa tregtia, ndërtimi dhe pasuritë e paluajtshme kanë vijuar rritjen, të mbështetura në një masë të madhe edhe nga turizmi dhe kërkesa e jashtme.

Ndërkohë që rritja ekonomike po reziston në nivele relativisht të larta, struktura e saj vazhdon të shtrojë shqetësime, sidomos për shkak dobësimit të vazhdueshëm të degëve të prodhimit dhe një varësie në rritje nga turizmi dhe pasuritë e paluajtshme./E.Shehu

Ky është artikull ekskluziv i Revistës Monitor, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Artikulli mund të ripublikohet nga mediat e tjera vetëm duke cituar “Revista Monitor” shoqëruar me linkun e artikullit origjinal.