Inter “ngren lart stekën”: Duam Champions League

Interi nuk fshihet: objektivi është Champions League. Zikaltrit e kanë të qartë ambicien për këtë sezon dhe këtë e kanë bërë të ditur hapur edhe lojtarët, edhe trajneri Cristian Chivu.

“Duam të fitojmë Champions League”, deklaroi Yann Bisseck, ndërsa Manuel Akanji ishte edhe më i drejtpërdrejtë: “Nuk dua vetëm kampionatin dhe Kupën e Italisë, dua të fitoj gjithçka.”

Në të njëjtën linjë është edhe Federico Dimarco, i cili pas fitimit të çmimit “Gentleman” theksoi: “Kampionati apo Champions? Nuk zgjedh.” Edhe drejtuesi i klubit, Beppe Marotta, nuk e fsheh ëndrrën për një tjetër Triplete, pas atij historik të vitit 2010.

Interi e ka nisur sezonin me shumë alternativa në sulm dhe me një grup të konsoliduar, por Chivu duhet të menaxhojë edhe vetëbesimin e tepruar të skuadrës, veçanërisht pas disa problemeve të shfaqura në fazën mbrojtëse.

Mesazhi për zikaltërit është i qartë: më pak vetëbesim, më shumë punë dhe përqendrim. Objektivi është të ngrihet edhe më lart steka në Evropë dhe të kërkohet trofeu që i mungon këtij cikli.

Ndërkohë, Dimarco, i rikuperuar nga një shqetësim në gju, është gati për rikthimin në fushë. Pas një sezoni rekord me asistime, italiani kërkon tashmë objektiva dhe trofe të rinj me fanellën zikaltër.